- Get link
- X
- Other Apps
Posts
बरवै छंद आये हे नवराती ,दीया बार। पारँव तोर दुवारी ,मँय गोहार। 1। दुख पीरा ला हरदे ,दाई मोर। बइठे हँव मँय दाई ,शरण म तोर।2। दे दे दाई मोला ,अँचरा छाँव। तोर नेवता पाके ,दँउड़त आँव।3। तिहीं रचाये दाई ,ये संसार। तोर मया बोहावय ,अमरित धार।4। तँय दाई हम लइका ,आवँन तोर। तोर दया के सागर ,करय हिलोर।5। तोर कृपा से जागय ,सबके भाग। कोंदा ला भी मिलथे ,वाणी राग।6। कइसे तोरे महिमा ,करँव बखान। सर्व शक्ति तँय दाई ,दे वरदान। 7। आशा देशमुख
- Get link
- X
- Other Apps
कुण्डलिया छंद मतदान के कीमत 1--सेवा करही कोन वो ,धरती दाई तोर। बिकत हवय ईमान हा ,अंतस रोवय मोर। अंतस रोवय मोर ,राज सच हा कब करही। फइले लालच रोग ,कोन दुख पीरा हरही। पइसा खेले खेल , हाथ मा धरके मेवा। पद सब उड़े अगास ,कहाँ धरती के सेवा। 2---अब्बड़ कीमत वोट के ,कोन हवय हकदार। सोचत रहिथंव रात दिन , कोन बनय सरकार। कोन बनय सरकार ,देश के पीरा जानँय। फेंके भ्रष्टाचार ,आम जनता ला मानँय। रखय तंत्र मजबूत ,करय झन कोनो गड़बड़। एक एक मतदान ,कीमती हावय अब्बड़। आशा देशमुख
- Get link
- X
- Other Apps
*गुरु घासीदास जयंती विशेषांक* *बरवै छंद* गुरू महिमा अमरौतिन के कोरा ,खेले लाल। महँगू के जिनगी ला ,करे निहाल।1। सत हा जइसे चोला ,धरके आय। ये जग मा गुरु घासी ,नाम कहाय।2। सत्य नाम धारी गुरु ,घासीदास। आज जनम दिन आये ,हे उल्लास।3। मनखे मनखे हावय ,एक समान। ये सन्देश दिए हे, गुरु गुनखान।4। देव लोक कस पावन ,पुरी गिरौद। सत्य समाधि लगावय ,धरती गोद।5। जैतखाम के महिमा ,काय बताँव। येला जानव भैया ,सत के ठाँव।6। निर्मल रखव आचरण ,नम व्यवहार। जीवन हो सादा अउ ,उच्च विचार।7। बिन दीया बिन बाती ,जोत जलाय। गुरु अंतस अँंधियारी ,दूर भगाय।8। अंतस करथे उज्जर ,गुरु के नाम। पावन पबरित सुघ्घर ,गुरु के धाम।9। आशा देशमुख 18-12-18
- Get link
- X
- Other Apps
छंदकिसान दिवस विशेष पर गीतिका छंद मा एक गीत हाँथ जोड़व मुड़ नवावँव ,भूमि के भगवान हो। गुन तुँहर कतका गिनावँव ,कर्म पूत किसान हो। हाँथ मा माटी सनाये ,माथ ले मोती झरे। सब किसनहा सुन तुँहर ले ,अन्न के कोठी भरे। धूप जाड़ा शीत तुँहरे ,मीत संगी जान हो। गुन तुँहर कतका गिनावँव ,भूमि पूत किसान हो।1। हे जगत के अन्नदाता ,मेटथौ तुम भूख ला। मेहनत कर रात दिन फेंकव अलाली ऊब ला। नीर आँखी मा लबालब ,सादगी पहिचान हो। गुन तुँहर कतका गिनावँव ,कर्म पूत किसान हो।2। आज तुँहरे दुख सुनैया ,नइ मिलय संसार मा। सब अपन मा ही लगे हे ,एक होय हज़ार मा। ये जगत के आसरा हव ,दीन जीव मितान हो। गुन तुँहर कतका गिनावँव,भूमि पूत किसान हो।3। आशा देशमुख कोरबा छतीसगढ़ 23-12-2018
- Get link
- X
- Other Apps
[26/08, 9:37 PM] Asha Deshmukh: आल्हा राखी विशेषांक ये राखी के रीत चलागन ,कोन करे हावय शुरुआत। आवव सुनलव भाई बहिनी ,कथा कहानी के ये बात।1। राजा बलि के परछो लेबर ,वामन रूप धरे भगवान। तीन पाँव भुइँया ला माँगय ,राजा बलि देवत हे दान।2। एक पाँव मा धरती नापय ,एक पाँव ला रखे अकास। एक पाँव मा बलि ला नापय, जा बलि कर पाताल निवास।3। वचन निभावय बलि राजा हा ,तब बोलत हावय भगवान। माँग जेन चाही बलि तोला ,मैं देहँव ओही वरदान।4। मोर राज्य के रक्षा करबे ,बन जा प्रभु मोरे रखवार। राज सिंहासन बइठे बलि अउ ,विष्णु देव हे पहरेदार।5। येती लक्ष्मी बइठे सोचे, चिंता दिखन लगय अब माथ। बड़ दिन होगे हावय अब तो,कहाँ गए हे मोरे नाथ।6। जान डरिस लक्ष्मी हर जइसे ,प्रभु हर रमे लोक पाताल। जग हित बर सब खेल करत हे ,लीलाधारी दीनदयाल।7। लक्ष्मी पहुँचे बलि के द्वारी ,रक्षा सूत्र रखे हे थाल। लक्ष्मी बनगे बलि के बहिनी ,माथ लगावय तिलक गुलाल।8। भाई बनके बलि हा बोलय ,माँग बहिन कोनो उपहार। दे दे भैया मोला तैहर ,तोर खड़े हे पहरेदार।9 तब ले भाई बहिनी खातिर ,रक्षा बंधन बनिस तिहार। बड़ पबरित ये राखी रिश्ता ,मान त हे जम्मों संसार।10 [26/08, 9:39 PM] Asha Deshmukh: हरिगीतिका छंद राखी विशेषांक रक्षा करव रक्षा करव ,निर्बल दुखी असहाय के। रख सूत्र धागा प्रेम के,दुश्मन बनव अन्याय के। भाई बहिन बंधु सखा,पबरित रखव सबसे नता। ये देश तो परिवार हे ,मन मा रखव बस नम्रता। [26/08, 9:39 PM] Asha Deshmukh: आशा देशमुख के बरवै छंद राखी विशेषांक किसम किसम के राखी ,सजे दुकान। ये डोरी के होवय ,बड़ सम्मान।1। बहिनी मन सज धज के,देखय बाट। भैया बर खोले हे ,द्वार कपाट।2। सुघ्घर राखी लानय ,थाल सजाय। खीर मिठाई जेवन ,बने बनाय।3। भाई बहिनी कुलके ,दूनो आज। ये तिहार ला मानय ,सबो समाज।4। भाई बर बहिनी के ,मया दुलार। पबरित डोरी बाँधय,ये संसार।5। सजे कलाई राखी ,माथ गुलाल। ये तिहार ला मानय,जग हर साल।6। हमर देश के पबरित ,आय तिहार। सुघ्घर लागय संस्कृति ,अउ संस्कार।7
- Get link
- X
- Other Apps
*मत्तगयन्द सवैया* 1,,सावन के महिना अति पावन रोज मना मन औघड़दानी । मान जही सिधवा शिव हा धरले फूल पान चरू भर पानी । देवत हे बरदान सदाशिव हाँसत हावय मातु भवानी । पाप कटे सब दुःख सिरावय बोलत हे सब पंडित ज्ञानी । 2,,,अर्जुन के रथ हाँकन लागय भूल गये किशना ठकुराई । पांडव पाँच खड़े रण मा अउ सौ झन हावय कौरव भाई । रोज मरे बुझगे कुल कौरव लोभ तरी सब होय लड़ाई । जीत गए सत के बल पांडव या सब मोहन के चतुराई । 3,,,तीज तिहार उमंग भरे मइके अँगना मन भावन लागे । देखत हे बहिनी मन बाट निहारत जोरन बाँधन लागे । रीत मया बँधके भइया बहिनी घर लेवन आवन लागे । जावत हे मइके बहिनी मन रीत ख़ुशी मुसकावन लागे । 4,,हाँसत खेलत बीत जही सुनले मनवा सबके जिनगानी । राखव प्रेम दया अउ अंतस राखव थोकिन आँखिन पानी । काबर तैं अटिवावत हावस रे बिरथा बल मा अभिमानी । ये जिनगी बरदान हरे मन राख मया मुख सुघ्घर बानी । आशा देशमुख
- Get link
- X
- Other Apps
*दुर्मिळ सवैया* 1,,करिया करिया दिखथे बदरा,अउ जाय कहाँ कति ले बरसे । सब खेत इहाँ परिया परगे ,अउ नीर बिना दुनियाँ तरसे । सुनले बिनती भगवान कभू ,किरपा करदे जग हा हरसे । जब तोर दया बरदान मिले प्रभु ,ये दुनियाँ मन हा सरसे । [ 2,,तन रोग घुना मन मोह घुना ,लगथे तब स्वाद सुहाय नही । कतको सिंचले दिन रात तभो ,जरहा लकड़ी हरियाय नही। कसके इरखा मन गाँठ बँधे ,सच ला छल हा पतियाय नही। अतका सुनले मनखे मन सागर लालच प्यास बुझाय नही । आशा देशमुख
- Get link
- X
- Other Apps
*मदिरा सवैया* 1--हे गणराज करौं बिनती ,सुन कष्ट हरो प्रभु दीनन के । रोग कलेश घिरे जग में,भय दूर करो सबके मन के । हाँथ पसारय द्वार खड़े भरदे घर ला प्रभु निर्धन के । तोर मिले बरदान तहाँ दुखिया चलथे सुखिया बनके। 2--राम रहीम धरे मुड़ रोवत नाम इँहा बदनाम करे । उज्जर उज्जर गोठ करे अउ काजर के कस काम करे । रावण के करनी करके मुख मा कपटी जय राम करे । त्याग दया तप नीति बतावय भोग उही दिन शाम करे । 3--काम करो अइसे जग मा सब निर्मल देश समाज रहे। मानय नीति निवाव सबो झन सुघ्घर गाँव सुराज रहे । दीन दुखीकउनो झन राहय हाँथ सबो श्रम काज रहे । हाँसत खेलत बीतय गा सबके जिनगी सुर साज रहे। 4--सूरज चाँद उवे जग में गुरु के बिन ये अँधियार हवे । जे जिनगी उजियार करे गुरु हे जगतारन हार हवे । वेद पुराण मिले जग ला सब ये गुरु के उपकार हवे । अंतस जोत जलावत हे महिमा गुरु ज्ञान अपार हवे । 5--मान मरे पुरखा मन के अउ जीयत बाप इँहा तरसे । रीत कहाँ अब कोन बतावय नीर बिना मछरी हरसे । देखत हे जग के करनी सब रोवत बादर हा बरसे । फोकट के मनखे अभिमान दिनों दिन पेड़ सही सरसे । आशा देशमुख
- Get link
- X
- Other Apps
*किरीट सवैया* 1--रोय किसान धरे मुड़ ला अब नीर बिना सब खेत सुखावय । का विधना अपराध करे हन ये दुख काबर हे नहि जावय । थोकिन मोर घलो सुनले बिनती महराज कहाँ सुख हावय । जोड़य हाँथ नवावय माथ बता कइसे जग दुःख सुनावय । 2---केशव माधव हे मधुसूदन गोपकुमार सुनो नटनागर । ये जग ला विपदा अति पेरय दूर करो दुख हे सुख सागर । प्रीत मया बिन ये जग मा अति पाप बढ़े छलके छल गागर । हे मुरली धर रास रचावव प्रेम दया बरसावव आगर । आशा देशमुख
- Get link
- X
- Other Apps
*अरसात सवैया* 1--ये मन मा अँधियार हवे भरदे सब ज्ञान हरो तम शारदे । भागत हे बिन डोर बँधे कस दे भटके मन मा रम शारदे । ज्ञान बसे जब ये हिरदे सब देखत भागत हे भ्रम शारदे । देवव दान दया किरपा उजियार करो जग पूनम शारदे । 2--जेन किलो भर लाय कभू अब पाव धरे घर लावय गोंदली । साग पताल घलो मँहगा अति कोन कहाँ अब खावय गोंदली । वो दिन हा सपना कस लागय फोरन मा ममहावय गोंदली । हाट बजार लगे अइसे सबके सिर ताव नवावय गोंदली । आशा देशमुख
- Get link
- X
- Other Apps
*मोद सवैया* कलयुगी बेटा 1--बाप सबो सुख वारत हे पर बात इँहा बेटा नइ मानै । ताश जुआ अउ मंद शराब म वो दुख ला पीये घर लानै । हारत हे समझा समझा नइ मोह मया एको पहिचानै । आखिर मा सब खेत चुगे चलगे अब हंसा का पछितानै । 2--रोज सिया पति राम रटो मन रोग सबो संसो मिट जाही । अंतस के पट खोलव जी तब राम सिया झाँकी दिख पाही । प्रेम मया बगरावव जी भव सागर रामा पार लगाही । हाँथ बने धर ले प्रभु के नइतो ठगनी माया भरमाही । 3--दूध दुहे बर राउत आवय हाँथ ठकेली हे गर नोई । लागय गाय गरू मन के अब बात सुनैया आ गय कोई । खेलत कूदत हे बछिया मन बोलय ग्वाला रे चुप गोई । गाय गरू अउ दूध बिना जुचछा घर कोठा और रसोई । 4-/आज घलो गरजे घुमड़े बरसे कस लागै बादर पानी । रोय किसान धरे मुड़ ला करथे बदरा कैसे मनमानी । खेत भरे करपा हर माढ़य कोन बचाही मोर किसानी । हे विधना हमरो सुनले सबके च लथे एमा जिनगानी । 5---दूध दुहे बर आवय राउत हाँथ कसेली हे गर नोई । लागय गाय गरू मन के अब बात सुनैया आ गय कोई । खेलत कूदत हे बछिया मन बोलय ग्वाला रे चुप गोई । गाय गरू अउ दूध बिना जुचछा घर कोठा और रसोई । 6--हाँथ धरे डमरू शिव शंकर नाचत हे भोले त्रिपुरारी । भूत परेत घलो सँग नाचय हाँसत हे दे दे सब तारी । माथ सजे मुस्कावत हे अति सुघ्घर चंदा हे मनहारी । साँप गला लिपटाय हवे करिया करिया हावै विषधारी । 7--हे शिव शंकर पारवती पति औधड़ दानी हे घट वासी । माँगत हौं बरदान सुनो प्रभु प्रेम दया दे दे अविनासी । मोह मया दुख कारण हे तब ले मन हाँसै छोड़ उदासी । जे हिरदे प्रभु वास करे तब कोन जही गंगा अउ कासी । आशा देशमुख
- Get link
- X
- Other Apps
*सुन्दरी सवैया* 1--तरसे रँधनी घर तेल बिना अउ मंदिर जोत जलावत घी के । मुखिया बनके इतरावत हे सबला उरकावत हावय पी के । पर के वश मा रहही जिनगी तब काय करे मरके अउ जी के । अब कोन बतावय दाँत इँहा अलगे अलगे कथनी करनी के। 2---डिगरी धरके किंजरे लइका मन काम बुता बिन हे भटके जी । मिल जाय कहूँ जब काम बुता तनखा मिलथे बहुते कट के जी । कतका गुण हे कतको झन के बिन शोर सिफारिश के अटके जी ।सरकार कती जब काम मिले तब इंखर तो लटके झटके जी। 3--उपकार मनावव ये जिनगी सुख ईश्वर के बरदान मिले हे । किरपा गुरु के मिल जाय कभू तब मानँव गा भगवान मिले हे । भरके चुप जेन समुन्दर के कस मान तभे सत ज्ञान मिले हे । जइसे मनखे मन काम करे वइसे जग मा पहिचान मिले हे । 4---सुरसा कस बाढ़त दाहिज के मुँह कोन इँहा अब बंद करावै । कतको धन डारत हे मुख मा तब ले भइया कमती पड़ जावै । कतको बिटिया बहिनी मन के जिनगी दुख के सँग बीतत हावै । कइसे अब रीत रिवाज निभै कइसे सुख के परिवार बसावै । 5--बड़का पद पावत ये मनखे मन काबर जी बहुते इतराथे । पर के पिरिया दुख ला समझे नइ फोकट मान मया दिखलाथे। कथनी अलगे करनी अलगे मउँका परथे तब माथ नवाथे । कइसे बिसवास करे अब गा तुरते सब एमन बात बनाथे । 6--बिहने बिहने लइका मन आवय बोलत हावय छेरिक छेरा। हुत पारत हे चिल्लावत हे पइसा अउ धान ल हेरव हेरा। मिलके सब आवत संग धरे अबड़े झन गोल बनावय घेरा। कतको झन तो दुइ चार घनी कतको झन फेर लगावय फेरा। आशा देशमुख
- Get link
- X
- Other Apps
*अरविन्द सवैया* 1--मनखे अतका चतुरा बनगे मन ही मन सोचत हे भगवान । सुख में सुमिरै तक नाम नही दुख मा सब बोलत हे भगवान । तन थोकिन जर्जर होवत हे कहिथे तब घोरत हे भगवान । खुद आलस में मनखे रहिथे अउ बोलय सोवत हे भगवान । क्षमा याचना 2--जिभिया गलती कर डारिस हे पर अंतस पावन हे गुरुदेव । पथरा पटके कस लागत हे अँखिया बर सावन हे गुरुदेव । परछो गुरु लेवत हे कहिके मन मोद उछावन हे गुरुदेव । जड़ हे मति मोर क्षमा कर दौ मुड़ लाज लजावन हे गुरुदेव ।। 3--पूस के रात बिन कंबल के तरसे हलकू जब आइस पूस जनाइस जाड़ । अति ठंड लगे ठिठुरे तन हा अउ हाँथ जुड़ावय काँपय हाड़ । जबरा बइठे रतिया भर संग म पूँछ हिलावय पावय लाड़ । बिहने हलकू जब खेत ल देखय रोवय अब्बड़ गा बम फाड़ । गुरु 4--मनखे मनखे सब एक हवे ,गुरु ज्ञान दिया सत जोत जलाय । सुमिरै गुरुनाम तरे भवसागर अंतस मा लहरा लहराय । दिन रात बरे सत जोत जिहाँ सुख के अँवरा सब ओर समाय । जिनगी सुधरे सब ताप मिटे सत के रसता गुरु ज्ञान बताय । 5--तिवरा बटरा तिंवरा बटरा गहदे अति सुघ्घर देखत ये मन हा हरसाय । अति कोंवर कोंवर पान उलोहय अब्बड़ इंखर साग मिठाय । धरके जब हाट म लाय मरारिन भाव बढ़ाय तभो बिक जाय । अतका मन भावत हे तिंवरा बटरा सबके मन ला ललचाय । आशा देशमुख
- Get link
- X
- Other Apps
*सुखी सवैया* 1--तृष्णा मोह जिनगी हर बीतय जोरत जोरत अंत समे कुछु काम न आवय । सब मोह मया भुलवारत हे अउ छूटत साँस सबो तिरियावय । गिनके मिलथे जिनगी दिन हा तब ले मनखे मन जाय भुलावय । कतको भलमानुष हे जग मा जस के करनी कर नाम कमावय 2--बलि बदना बदके बलि देवत हे कतको मनखे मन देव मनावय । झन मारव जीव जनावर ला सब मा सुनले भगवान समावय । नइ माँगय देव कभू कउनों बलि ये मनखे मन रीत बनावय । कुकरा बकरा बधिया कहिके मनखे जिभिया रस स्वाद बतावय । 3--आज का चित्रण पहली बिहने हरिनाम भजे अउ राम कहे जय राम कहे सब । अब तो उठके सब फोन धरे अउ कॉल करे मिस कॉल करे तब । युग हा बदले मनखे बदले तकनीक नवा सब बौरत हे अब । रतिया भर जागय नेट धरे दिन मा सुसतावय काम करे कब । 4--नवा साल के बधाई शुभ होवय साल नवा सबके जिनगी हर सुघ्घर सुन्दर बीतय । परिवार सबो खुशहाल रहे सुख के तरिया ह कभू झन रीतय । सुख मान मया सुमता नित बाढ़य दुःख सुवारथ ला सब जीतय । दुनियाँ भर नाम करे जस के मनखे मन प्रेम मया रँग छीतय । 5--सब खोजय मंदिर तीरथ मा अउ खोजत हे तुंहला बन मा प्रभु । कउनों नइ झांकय अंतस ला बइठे हिरदे रहिथौ मन मा प्रभु । नइ रीझव राज सिंहासन मा नहि दौलत मा नइतो धन मा प्रभु । बस भाव भरे मन उज्जर देखव रीझव बोइर माखन मा प्रभु । आशा देशमुख
- Get link
- X
- Other Apps
*भुजंग प्रयात छंद* *कृष्णा* बचाये हवे लाज जे दौपदी के। उही हे जँचैया ग नेकी बदी के। महायुद्ध में जेन गीता सुनाये। सबो लोक मा ज्ञान गंगा बहाये। अमीरी गरीबी दिए पाट खाई। सुदामा सखा के निभाए मिताई। धरा मा बढ़े हे जभे पाप भारी। धरे हे तभे जन्म कृष्णा मुरारी। *भाव* रिसाये हवे मोर तो लेखनी जी। इँहा भाव आवै न एको कनी जी। बिसे हा लुकाये गये कोन कोती। चुपे चाप कॉपी नही शब्द मोती। 1 कहाँ मेर खोजौं कहाँ मेर जावौं। रिसाये हवे भाव कैसे मनावौं। लगे भावना के दिया हा बुतागे। अँधेरा तरी मा जिया हा लुकागे। 2 गुरू मोर रोजे लुटाये खजाना। सिखाये विधा छंद सुनावै तराना। जिहाँ ज्ञान के रोज जोती जले हे। तिहाँ एकता प्रेम मोती पले हे। 3 नवा सोच आवै पुराना मनावै। इहाँ आज काली म जीना सिखावै। लगे जिंदगी हा नवा रूप पावै। दया प्रेम बैठे घृणा लोभ जावै।4 मया हे दया हे कहे एक नारा। सबो ला गुरू छाँव लागै पियारा। बड़े हे न छोटे सबो एक जैसे। मिले मातु गोदी गुरू प्रेम वैसे। 5 जहाँ ज्ञान संस्कार दूनो पले हे। उहाँ मान रिश्ता भरोसा मिले हे। जिहाँ साधना छंद के हे पुजारी। धरे प्रेम बंशी बजाए मुरारी। 6 *देश के दुर्दशा* बढ़े देश मा आज बेरोजगारी। धरे घूमथे जान डिग्री ग धारी। कहूँ मेर कोनो मिले काम बूता। चले रोज देखौ घिसाये ग जूता। 1 सबो तो करे हे लिखाई पढ़ाई। करे स्कूल कालेज भारी कमाई। लगे आज विद्या ह व्यापार होगे। छले और कोनो भले लोग भोगे। 2 बढ़े रोज देखौ ग चोरी चकारी। बने आदमी हा बने हे भिखारी। सबो भ्रष्ट हे आज नेता सिपाही। दिखे बंद रस्ता कहाँ लोग जाही। 3 बड़े नाम वाले तिजोरी भरे हे। कहूँ मेर हत्या डकैती करे हे। धरे हे तराजू हवे न्याय अंधा। चुपे साँच बैठे करे झूठ धंधा। 4 करे कोन उद्धार ये देश रोवै। रखैया हवे मोर वो जान खोवै। बता देश के कोन पीरा सुनैया। जहाँ मेर देखौ वहाँ हे लुटैया। 5 कहे के बुलंदी हवे आज नारी। सुरक्षा बिना तो डरे रोज भारी। कहाँ मेर जावै कहाँ हे ठिकाना। लगे आज बैरी बने हे जमाना। 6 दिखाये समाचार बेटी बचावौ। कहाँ मेर बाँचे यहू ला बतावौ। बचैया नही निर्भया दामिनी के। सुनैया नही हे स्वरा रागिनी के। 7 *सुरता* मही के बिलोनी कनौजी करोनी। कहाँ जानथे आज बाबू ग नोनी। न छींका न जाने नही म्यांर जाने। करे गोठ कैसे समे आय आने। 1 बँधाये न गैया नही हे चरैया। मिले हे कहाँ आज बूता करैया। कमैया बिना तो बिके खेत डोली। सबो बेचके दू बनाए ग खोली।2 उगावै नही अन्न खाही ग काला। बिसाये नही साग खोजै मसाला। सबो स्वार्थ मा हे नता लागमानी। मया के न बोली दया के न पानी।3 सबो ठूँठ होगे कहाँ छाँव पावै। गड़े पाँव काँटा कती मेर जावै। भले आदमी के नही हे पुछारी। जिही हे लुटैया उही हे पुजारी। *आज के हालात* कहाँ गै मया मान हाँसी ठिठोली। कहूँ खोज देवौ नता मीठ बोली। लगे आँच भारी बरे भीतरी मा। बुझाये दिया हे इहाँ देहरी मा। करे काय दाई ददा गोठ बानी। बहू बेटवा के चले हे सियानी। करू बोल ले या करे मीठ बोली। पुछारी बिना तो परे एक खोली। सुनैया नही हे कहूँ आज पीरा। हवे हाल जैसे करू होय खीरा। विदेशी रिवाजे दिखे हे नतीजा। कहाँ हे सगा आज भाई भतीजा। आशा देशमुख 17 ,4,2018
- Get link
- X
- Other Apps
*लवंगलता सवैया* *भ्रम* भरे कचरा मन भीतर मा अउ संत बने बड़ ज्ञान बघारय। बहारत हे अँगना कुरिया घर अंतस उंखर कोन बहारय। धरे पतरा भरमावत हे भ्रम लोभ कथा धर नाव उतारय। बतावव जी भगवान घलो हर कर्म बिना कब भाग सँवारय। *विकास या विनाश* कहाँ खुशहाल रहे सब जीव दिनों दिन जंगल पेड़ कटावय। पड़ै कमती अब तो भुइयाँ छत ऊपर लोगन फ़्लैट बनावय। बिकास कहाय बिनास हवे पर ये सच के सब रूप दिखावय। दवा नइहे अउ रोग बढ़े बड़ संकट से अब कोन बचावय। *नशा* नशा बइरी धन नास करे घर मा घुसके परिवार बिखेरय। उखारत हे सुख के जड़ ला जिनगी तन ला गिरहा कस पेरय। लहू तन के बस चूसत हे अउ रोग समेत घलो दुख घेरय । खुवार करे तन के धन के अउ आखिर राख मसान म हेरय। *ठौर नही* नहीँ अब ठौर इँहा जग मा बिटिया महिला मन के अब देखव। लिखे हस भाग तहीं विधना अब आव तुही मन हा सुधि लेवव। इँहा अब रक्षक भक्षक हे घर मंदिर के बिसवास ल देवव। फॅसे मझधार हवे नइयाँ पतवार धरो प्रभु नाव ल खेवव। आशा देशमुख
- Get link
- X
- Other Apps
*वाम जवैया* *किसान* उगावय अन्न उही मन हा दुख भूखमरी दिन काटत हावै। उबारय कोन इहाँ उनला बइठे सब ऊपर रिश्वत खावै । सबो जग जीयत खावत हे इँखरे बल मा सब राज चलावै। कमावत हे दिन रात किसान तभो हक के सुख ला नइ पावै। *गरमी* जरै पँउरी अति घाम जनावय जेठ सहीं गरमी हर आवै। सुहाय नही कउनो अब चीज दही अउ अम्मट हा मन भावै। हवा चलथे अउ लू कस लागय नानुक नानुक पेड़ सुखावै। पियास मरे सब जीव जनावर जाय कहाँ सब ताल अटावै। *कमाई* भले कतको भगवान मना नइ पूरय गा सुन पाप कमाई। कमावय जाँगर पेरय जेन उही धन मान लगे सुखदाई। बिगाड़ करौ झन दूसर के परही खुद ला करनी भरपाई। उही मनखे सुख पावत हे पर के करथे नित जेन भलाई। *सुरता* धरे हँउला पनिहारिन जावय आज नही अब वो दिन आवै। समाय हवै सुरता बस मा सनिमा कस घूमय भाव लुभावै। नवा जुग आय हवे अब तो तइहा मन के सब रीत भुलावै। सँजोय कहाँ कइसे पुरखा मन के सब चीज नँदावत हावै। *सुख-दुख* कभू दुख आय कभू सुख आवय बीच झुलै सबके जिनगानी। बरोबर चाहय मान दुनो अउ लाय दुनो झन आँख म पानी। घरो घर ठौर रहे इँखरे बस अंतर भेद बतावय बानी। निभावय पात्र सबो मनखे मन जेन लिखे भगवान कहानी। आशा देशमुख
- Get link
- X
- Other Apps