*सुन्दरी सवैया* 1--तरसे रँधनी घर तेल बिना अउ मंदिर जोत जलावत घी के । मुखिया बनके इतरावत हे सबला उरकावत हावय पी के । पर के वश मा रहही जिनगी तब काय करे मरके अउ जी के । अब कोन बतावय दाँत इँहा अलगे अलगे कथनी करनी के। 2---डिगरी धरके किंजरे लइका मन काम बुता बिन हे भटके जी । मिल जाय कहूँ जब काम बुता तनखा मिलथे बहुते कट के जी । कतका गुण हे कतको झन के बिन शोर सिफारिश के अटके जी ।सरकार कती जब काम मिले तब इंखर तो लटके झटके जी। 3--उपकार मनावव ये जिनगी सुख ईश्वर के बरदान मिले हे । किरपा गुरु के मिल जाय कभू तब मानँव गा भगवान मिले हे । भरके चुप जेन समुन्दर के कस मान तभे सत ज्ञान मिले हे । जइसे मनखे मन काम करे वइसे जग मा पहिचान मिले हे । 4---सुरसा कस बाढ़त दाहिज के मुँह कोन इँहा अब बंद करावै । कतको धन डारत हे मुख मा तब ले भइया कमती पड़ जावै । कतको बिटिया बहिनी मन के जिनगी दुख के सँग बीतत हावै । कइसे अब रीत रिवाज निभै कइसे सुख के परिवार बसावै । 5--बड़का पद पावत ये मनखे मन काबर जी बहुते इतराथे । पर के पिरिया दुख ला समझे नइ फोकट मान मया दिखलाथे। कथनी अलगे करनी अलगे मउँका परथे तब माथ नवाथे । कइसे बिसवास करे अब गा तुरते सब एमन बात बनाथे । 6--बिहने बिहने लइका मन आवय बोलत हावय छेरिक छेरा। हुत पारत हे चिल्लावत हे पइसा अउ धान ल हेरव हेरा। मिलके सब आवत संग धरे अबड़े झन गोल बनावय घेरा। कतको झन तो दुइ चार घनी कतको झन फेर लगावय फेरा। आशा देशमुख