*सर्वगामी सवैया* समे चोर चौपाल सुन्ना गली मा उदासी पटागे हवे गा कुआँ घाट पानी । रद्दा पुछैया बटोही कहाँ गे मिले हे कहाँ जी मया गोठ बानी । चूल्हा बरे पेट आगी बुझाये करे राज गच्छी दबे आज छानी । लागे लुकाये समे चोर लेगे सबो चीज जुच्छा बताये कहानी। शिवरात्रि मेला भोला दुवारी हवै भीड़ भारी मनौती मनावै खड़े हाँथ जोरे। लोटा भरे दूध पानी चढ़ावै कहे भक्त देवा हरौ दुःख मोरे। आये इँहा संत साधू फकीरा खड़े रंक राजा सबो द्वार तोरे। आशा मनोकामना होय पूरा सबो भक्त आये ख़ुशी ला बटोरे। केंवट प्रसंग 1 जादू भरे पाँव तोरे हवे राम कैसे लगावौं इँहा पार गंगा। डोंगा बने काठ के मोर रामा इही जीविका मोर संसार गंगा। बानी गुहाराज के भेद भारी कहाँ कोन तारे कहाँ तार गंगा। लावै कठौती गुहाराज धोवै सियानाथ पौंरी बहे धार गंगा। 2 भैया गुहा तैं बड़े भागमानी दुवारी म तोरे ग रामा पधारे। बैकुंठवासी ग लक्ष्मी नरायेन आये तपस्या बिना देख डारे। लांनै कठौती कुटुंबी बुलाये ग पौरीं सियाराम के तैं पखारे। गंगा कहे नाम के तारिणी हौं इहाँ आज मोला गुहाराज तारे। आशा देशमुख